Woodstock 的回憶

上星期六生日去咗海洋公園玩..嘻嘻...

因為係同父母去..所以原本己經打算唔會玩d咩機動遊戲...純綷都係公園一天遊...只不過唔係維園係海洋公園咁解架啫..

但估唔到..唔玩機動遊戲..一日都係玩唔哂海洋公園...真係奇怪...平時又真係唔覺佢咁多嘢架啫..

第一站就去咗熊貓館睇兩隻新熊貓..

呢度係兩隻新的熊貓..

呢隻就係舊的...好大隻呀...

出度去..仲有好多好多既熊貓紀念品賣添

沿路仲有好多熊貓既裝飾架..你睇吓呢個幾攪嘢...

之後就去咗睇威威劇場...唔講唔知..我都係第一次睇架咋..

我初時仲同阿媽講可能係d鸚鵡係度講啫...原來...

仲有好大隻龜添呀...哈哈..

跟著...阿媽竟然話要搭小火車...我話..唔係卦...同細路爭嘢玩...唉..算啦..橫豎我都未搭過...我仲問她駛唔駛分三架車等我係前..老爸係後幫佢影相添...

搭完之後...老爸己經趕唔切睇鸚鵡劇場...佢好唔開心呀..(都唔知係邊個帶邊個呢玩) 我地唯有三條友係門口睇吓兼比佢影下相啦...因為d雀飛得太快..所以我係影唔到架...

之後...阿媽又話要玩旋轉木馬...我同老爸對望之後係...滴汗...上到去...我以為以佢既年紀...緊係坐d馬車位...點知佢竟然同我講..緊係要騎上去啦...如果唔係點影相...我心諗...唔係卦...仲琴....佢就話身無長物啫...我又要揹袋..又要攞食物..仲要協助佢上去..之後仲要自己琴埋上去再轉身影相...難度...起碼90%啦

不過今期改咗做旋轉熊貓lu...

之後仲去咗睇人地訓練海豚...

又好趕咁搭巴士去另一邊睇海洋劇場.. 以我坐最高個排...又只係用我部手提影既相...它算係影得唔錯架喇..

最後一站就係我今次未去之前一直都好想去既水母館...當然之前係兜去睇過吓d海洋館呀..鯊魚館呀咁啦..

就咁一隻隻水母係好難見到亦都唔係好靚...但當d燈光由藍紫綠紅係咁轉既時候...d水母係水中游游下那個情景就真係好靚!!

仲有好多水母紀念品賣添..

睇完都己經五點多...原本約咗六點係銅鑼灣打邊爐...點知都要遲半個鐘...好彩仲有得打啫...如果唔係d邊爐蟲會係咁咬我架!!